Ikalawang Tahanan

Ay, teka teka! Bago ko umpisahan yan, gusto ko muna samantalahin ang pagkakataon na ito para hikayatin muli ang mga maabot ng paskil na ito na lagi ninyong isali sa inyong mga panalangin na panatilihing matatag at nagpapatuloy ang mga kababayan nating sinalanta ni Yolanda. Hindi naman kasi talaga biro ang pinagdaanan nila kaya sana kahit na sa simpleng pagtawag natin sa Itaas ay maisali natin sila para patuloy silang gabayan at alalayan hanggang sa kanilang muling pagtayo sa sariling paa. (brrr… ako na ang super late)


Source: HelpYolandaVictims

Isang pasasalamat din pala dahil ang mangilan-ngilan na kakilala ko sa Kabisayaan ay ligtas at nasa maayos na kalagayan na ngayon gayundin ang kanilang mga pamilya. Amen.

Marami pa sana akong gustong sabihin patungkol sa bagyong Yolanda at ng kanyang mga nasalanta kaya lang hindi kagandahan na namnamin pa yung mga hindi magagandang nangyari. Kaya tara! move on!

Bago ang lahat ay gusto ko din batiin si hanging amihan na umiihip mula sa hilagang-silangan ng Pilipinas. Nang dahil sa’yo ay ang hirap na ako ulit bumangon sa umaga. Mas masarap na ang maglimlim. Ahihi! Pero kahit na may ganyang effect ka sa akin ay mas lalu mo pinapasarap ang paghigop ko ng mainit-init na choco drink sa almusal. Mas mabilis na rin ako ngayon matapos maligo dahil ayoko sipunin. Hindi na po ako nakakapaghilod ng maayos. At higit sa lahat ay nagalugad ko na ulit ang aking walk-in bodega para mailabas ang mga mahahaba at makakapal na damit panlamig.

Sa madaling sabi ay ramdam na ang simoy ng kapaskuhan. Kaya kung may gift na kayo sa akin, ipadala nyo na ng maaga ha. Lam nyo na ang gagawin. ^_^ Ihuhulog ko rin kasi sa donation box sa Mall dahil alam kong mas magiging masaya yung makakatanggap nun kasya sa akin.

O sya eto na ang sinasabing ikalawang tahanan – ang workplace o office. Agree ba kayo na ito ang ikalawang tahanan? Sa isang aspeto siguro ay oo at sa ilang mapag-usisang opinyon ay hindi naman. Sa mga agree dyan ay isa na si kuya na nangingisi habang nagbabasa dahil nungka na halos ang kusina at working area nya ay magkasama na sa iisang office table. Sandamakmak ang pagkain sa drawer at kung anu-anong powdered drinks ang makakalkal mo. May tasa o baso palagi sa tabi ng computer monitor? Tsek!

Ate sa kabilang table, nag-uugat na yung egg pie mo sa drawer. Ahihi!

Agree din siguro yung mga hindi na alam ang kaibahan ng kanyang sariling kuwarto at ng opisina. Yun bang may mga ilang set na ng damit sa locker at may spare talaga na underware. May maliit pa na unan ha? Susme, hindi po tayo mabubuhay para magtrabaho. Nagtatrabaho po tayo para mabuhay.

Sa madaling salita ay kulang na lang ay sa office na tumira para lang magampanan ang responsibilidad na iniatang. Tsk tsk tsk, ganyan na po katindi ang pangangailangan. Hindi masama kung paminsan minsan lang dahil sa hinihingi ng pagkakataon pero kung halos araw-araw na, utang na loob mga kuya at ate. Mortal kang nilalang na may puso at balun-balunan din.

At dahil ito nga ay itinuturing ng iba na ikalawang tahanan, kung makapagtsinelas naman ang iba ay wagas kahit na office hours na. At kapag naglakad ha, kuntodo gasgas sa sahig ang havaianas na nabili sa bangketa. ^_^ Ahihi!

Dito rin sa itinuturing na ikalawang tahanan nangyayari ang maraming pag-iibigan. May bawal, may legal, may complicated kase pareho silang lalake. Ahahaha! At kung anu-ano pa. Di ba mas nagiging close tayo sa ating mga katrabaho kapag nakakasabay natin sila sa pagkain? Kahit na rin sa merienda break. Tapos ayun! Dun na ang simula ng maraming istorya. Pagpapahalaga, disiplina at respeto na lang ang siyang magiging kaibahan.

Ikalawang tahanan nga sigurong maituturing dahil mas maraming oras ang nagugugol natin dito sa maghapon at magdamag. Kalaunan ay di natin namamalayan na halos dito na rin pala halos umiikot ang mundo natin. Isama mo pa dyan yung mga nagiging ikalawang Tatay at Nanay, Tito at Tita, Kuya at Ate at maging mga kapatid natin na maituturing. Sigurado ako na karamihan sa atin ay maraming ala-ala ang naimbak sa panahon ng paghahanap-buhay. Yung iba dyan na nagkaroon ng boyfriend/girlfriend. Dyan na nagkaasawa
at nagkaroon ng mga anak. Dyan din nagkaroon ng kabit na sumira sa pamilyang binuo. At ang iba ay dyan na rin binawian ng buhay.

Di ba, maliban sa iskwelahan habang tayo ay nag-aaral, kung susumahin lang ay ang trabaho at ang mga nakapaligid dito ang nangungunang umuukupa at pinaglaanan natin ng panahon habang tayo ay mabubuhay. Sa kabuuan nga ay konti lang ang oras para sa sarili kaya madalas na naririnig ang dahilan na “bee see”. Dahil sa trabaho ay napapalampas na ang mga okasyon ng pamilya. Dahil sa trabaho ay mas madalang na rin magkita-kita. Lalu na sa mga demanding ang trabaho na kapag panahon ng bakasyon at holidays sila mas kailangan, sura!. E ano pa kaya yung nasa kabilang bahagi ng mundo ang lugar ng hanapbuhay. Milya-milyang distansya at pinaglalayo ng mga karagatan ang pagitan. Mas mahirap di ba?

Kaya sana kahit na mahirap magbalanse, pilitin natin na magkaroon ng mas marami pang oras para sa sarili, sa pamilya at sa mga taong importante sa atin. Hindi naman kasi yan parang cross stitch na kapag mali ang bilang na nasimulan ay tatastasin lang at mag-uumpisa lang ulit. Kaya huwag sayangin ang panahon habang meron at marami pa tayong pagkakataon para gawin itong mas kapaki-pakinabang at mahalaga. Totoong kailangan natin maghanapbuhay para mabuhay pero huwag din natin kakalimutan na kahit na merong tayong itinuturing na ikalawa at pansamantalang kanlungan, mas higit at dapat natin bigyan halaga at pagtuunan ang totoo at una nating tahanan.

Maligayang Pasko sa inyong lahat! O ha! Isa na siguro ako sa mga nauna o maagang bumati sa inyo. ^_^

malapitna

4 thoughts on “Ikalawang Tahanan

Leave a Reply

Fill in your details below or click an icon to log in:

WordPress.com Logo

You are commenting using your WordPress.com account. Log Out / Change )

Twitter picture

You are commenting using your Twitter account. Log Out / Change )

Facebook photo

You are commenting using your Facebook account. Log Out / Change )

Google+ photo

You are commenting using your Google+ account. Log Out / Change )

Connecting to %s